2025-жылдын 10–12-июнунда С.Нааматов атындагы Нарын мамлекеттик университетинде Erasmus+ алкагындагы “Кыргызстандагы жогорку окуу жайлардын финансылык өз алдынчалыгын өнүктүрүү” (DEFA) долбоорунун үч күндүк воркшопу болуп өттү. Иш-чарага Кыргызстандын 10 жогорку окуу жайынын жана европалык өнөктөштөрдүн өкүлдөрү катышты.
Программага пленардык сессиялар, долбоордун жыйынтыктары боюнча презентациялар, финансылык отчёттор, финансылык өз алдынчылык моделдери жана долбоордун кийинки этабы боюнча стратегиялык пландаштыруу иштери кирди.
Биринчи күнү, 10-июнда, воркшопту НМУнун ректору д-р Тилек Исабеков жана долбоордун координатору д-р Нурлан Омуров ачышты. Андан кийин европалык өнөктөштөр — Флоренция университети (UNIFI), Отто фон Гери́ке университети (OVGU), CESIE изилдөө жана демилгелер борбору — долбоордун жүрүшү боюнча мазмундуу презентацияларды сунушташты.
Экинчи күнү, 11-июнда Кыргызстандын бардык өнөктөш университеттери өздөрүнүн финансылык чыгымдары жана кошумча каржылоо боюнча отчетторун көрсөтүштү. Бул күнү долбоорду башкаруу кеңешинин (PMB) жыйыны жана координаторлордун жолугушуусу өтүп, жалпы аракеттердин багыты жана ар бир өнөктөштүн жоопкерчилиги такталды.
Үчүнчү күнү, 12-июнда, долбоор алкагында иштелип чыккан каржылык автономия моделдери көрсөтүлүп, аларды Кыргызстандын шартына ылайыкташтыруу маселелери талкууланды. Туруктуулукка жана долбоордун максаттарын эффективдүү ишке ашыруу үчүн жалпы аракеттерди бириктирүүгө өзгөчө көңүл бурулду. Күн "Салкын-Төр" жаратылыш паркындагы тимбилдинг жана маданий программа менен жыйынтыкталды.
Воркшоптун аякташы DEFA долбоорунун ишке ашуусунда жаңы этаптын башталышын белгиледи. Долбоордун жыйынтыктары реалдуу түрдө колдонулуп, бекемделген өнөктөштүк байланыштар Кыргызстандын жогорку билим берүү системасында туруктуу реформаларга жол ачууда.
